من اشعار على سلامة
سبيل أم عباس
بقولها ماتيجي
نحط سيناريو للاحداث
قالتلي ياعم
اللي هايسري علينا
هايسيري على الناس
قولتلها
يعني لو مفيش ميه
قالتلي
يبقى سبيل ام عباس
قولتلها
ولو مفيش عيش
قالتلي
يبقى رز وقلقاس
قولتلها
ولو مفيش غاز
قالتلي
نسيت الوابور ابو فونيه
وطربوش وكباس
قولتلها
ولو مفيش نور
قالتلي
يبقى احسن
عشان ماتشفش البنات
اللي ف الدش
قولتلها
ولو مفيش بنات
قالتلي
يبقى نقعد عند امي
بقى وخلاص
قولتلها
ولو فيه قلق
قالتلي
كوباية شاى
تظبط المزاج وتعدل الراس
قولتلها
ولو في خوف
قالتلي
نقفل علينا الباب
بالقفل والترباس
قولتلها
ولو مفيش هوا
قالتلي
أهوي عليك بالجرنال
وتهوى عليا بالكراس
قولتلها
ولو مفيش أمل
قالتلي يالهوي
حرام عليك
ياساتر يارب
ما احنا أهو
من غير قلب
ومن غير احساس
وعايشين
عاجبك كده أهو النور قطع
ومش شايفين
حاسب تدوس ع الواد
واوعى تكسر طبق
واللا كوباية
واللا كاس
No comments:
Post a Comment